Nha nomi i: Mamadu Lamini Dansó, fundadur di “Academia Dansó Kung-fu”
N’cumsa pratica artis marcialis asiáticos, contra nentra na vida tropa di Guiné. Na cumsada, nta aprindiba Shotokan, es i um stilu di Karate.
Na 1987 mbai pa Hungria, pa bai studa artes militaris. La qi mbá cunsi nha mestre di Tai-chi ku Wing-chun Kung-fu, mestre tchomadu Tchoba Dáné. Disna di la, ncontinua buri nha habilidadis nes Arti, thomadu Kung-fu.
Ncaba nha studu na Hungria na ano 1991, dipús nriba ba Guiné-Bissau, contra ntchiga son, nfunda nha purmeru iskola di Kung-fu na Cortel di Báséria N°1. Na Bissalanca, dipus na Brigada Mecanizada 14 di novembru, mas tardi na QG. /Kortel General/. Má pa pudi rispundi pididus di djintis, ku sedu populassons, i pui n’abri iskola na Bairu Militar; na Polícia Móvel (diánti di fera di Bandé), dipus na UDIB, mas tardi na INEP. Assim qi ncompleta 7 iscolas na Bissau.
Na 1996 nriba mas pa Hungria, pabia di rasons familiar, má támbi pa mpudi bai buri nha sabedoria na artes di gueria. Contra ntchiga tan son, nfunda mangadi iscolas na capita hungaru, ku tabancas pertu di capital.
Enfim, hora tchiga di ábri porta qi djintis tarda na pera… abertura di Academia di artes marcialis.
Mestris sta tudo prunto pa bá cumsa instrui kil jovens; homis cu mindjeris amantis di desportu, má i ca só civilis, támbi kil djintis di seguránças. Nó militares cu polícias tudo pudi bim, pabia es mestre própi i erabadja instructor na mangadi kortelis di Bissau. Porta na iábri pa bós, pa bai fresca qi conhecimentos qi bó recibi na estrangeiro.
Motivus di kiriasson di Academia:
Pa fassi um Centro di Arti di guera cu manéra di difindi bu cabeça própi.
*Pa pudi forma djintis sam. Djintis qi tene saúdi
• Son alguim sam qi pudi tarbadja;
• Qim qi sam, cu pudi da mon na atividadis di leba terra dianti;
• Qim qi sam, qi pudi participa diritu, na cuida di tchon, támbi pa difindi kil ki di nós tudu.
• Qim qi sam, qi pudi djunta cabeça, i pa pui utrus seta cumpri ordis, cu leis di Tchon.
• Algim sam, i kil qi tene: curpu, sintidu, cabeça tudu diritu. Algim calmu, capaz di cumprindi utro djintis, i ca mporta nunde cu sta nael, nunde cu na tarbadja: i na stadu ó na guverno, na tudu ladu cu na tarbadja, pa bu pudi ntindi djintis diritu.
• Qim qi sam, i kil qi pudi participa ativamenti na actividadis económicus di terra.
Esis qinnó objectivus: sinau manera di cunsi bu cabeça própi, pa manera di fassiu ultra-passa kil limitis, cu barreras ki abó própi fassi bu cabeça.
Palavra Kung-fu i um palavra qi tene significado mahga del. Tudo tarbadju ó modalidadi, ó arti ki bu sibi fassi diritu cu precison, i kung-fu ku-na fassi. Má pami, sentido di bardadi di kung-fu, i pa alguim sibi domina si fraquesa. Cusa ki amim nfia, i Cuma adversário más garandi di alguim i si fraquesa cu si medos; má támbi piór duença ki alguim pudi tene na bida, i si falta di sibi. Kung-fu ta sinanu domina es nhamal-nhamalis di bida. Manera di aprindi guberna cu sibidoria bu quinti cabeça,
Pa bu fiançana bu cabeça própi; pa bu ca medi nada; pa bu bata fassi cussas ki bu pensa; pa bu tene bu bida na bu mon.
Nó ensino sta na bás di harmonia di essis:
–menti;
–moral;
–spíritu
–curpu
Auto-defesa: Ta sinanu tene control di bu curpo na luta. Manera di sibi difindi bu cabeça, pa bu sibi forsidja bu adversario fasi kil ki bu misti cu-el. I ta sinánu manera di usa kil armas di difindi curpo cu-el, na um nível elevadu.